Nakastreken ti Spain iti quarterfinals ti FIFA World Cup 2026 kalpasan nga inabakda iti Portugal, 1-0, iti Round of 16 idiay Dallas Stadium.
Nagbalin a bannuar ti Spain ni Mikel Merino kalpasan a nakagun-od iti kakaisuna a goal iti stoppage time manipud iti assist ni Ferran Torres.
Sanguen ti team ni Head Coach Luis De La Fuente ti mangabak iti laban ti USA ken Belgium idiay Los Angeles Stadium iti sumaruno a round.
Nabara iti first half ti ay-ayam, ngem awan ti nakaiskor. Sinayang ni Mikel Oyarzabal iti kapintasan a gundaway ti Spain, idinto a naisalakan ti goalkeeper a ni Diogo Costa iti sabali pay a napeggad a shot ni Alex Baena.
Nagpangta met ti Portugal iti panangidaulo ni Cristiano Ronaldo, ngem ti kaasitgan a nagun-odda ket iti timmama a tira ni Nuno Mendes iti crossbar.
Agpada a nagbalin a naannad dagiti dua a team iti maikadua a paset agingga a kamaudiananna naburak ni Merino ti tie kadagiti maudi a kanito ti laban.
Kabayatanna, posible a daytoy iti maudi a pannakipaset ni Portugal captain Cristiano Ronaldo iti FIFA World Cup. Sakbay ti torneo, pinasingkedan ti 41-anyos a beterano a daytoyen ti maudi a panagparangna iti World Cup.
Ileppas ni Ronaldo ti karerana iti World Cup nga addan ti 11 goals iti 27 a laban ken nagbalin a kaunaan a player a naka-iskor iti innem nga edision ti torneo.###
