Naipaayan ti Provincial Government of La Union (PGLU) ti Fiscal Transparency Award – Regional Category manipud ti Department of Budget and Management Regional Office 1 (DBM RO1) iti naangay a FY 2026 Local Budget Forum idi Hulio 7, 2026 iti Center for Harvest Activities, Value Chain Development, Innovation, and Training Coliseum idiay Vigan City, Ilocos Sur.
Ti laeng PGLU iti kakaisuna a gobierno probinsial a nakaawat ti award iti regional category.
Binigbig ti pammadayaw iti agtultuloy a panangitandudo ti PGLU ti fiscal transparency, accountability, ken nasayaat a panangimaton iti kuarta iti sidong ti panangidaulo ni Governor Mario Eduardo C. Ortega.
Pammaneknek met daytoy iti agtultuloy a panagsurot ti probinsia kadagiti naituding a reportorial requirements ken dagiti prinsipyo ti nasayaat a panangimaton.
Iti nagan ti Gobernador, inawat da Board Member Teresita O. Garcia, Chairperson ti Sangguniang Panlalawigan Committee on Finance, Budget and Appropriations; Provincial Budget Office Officer-in-Charge Genelen B. Nisperos; ken Local Finance Committee Chair and Provincial Treasurer Janet D. Molina iti pammadayaw.
Pinadayawan met ti DBM RO1 dagiti lokal a gobierno ti Aringay ken Santol babaen ti Fiscal Transparency Award.
Nagyaman ti PGLU iti DBM Ro1 iti naawat a pammigbig ken inpaganetget manen tii agtultuloy a panangitandudo ti nalaing, sipupudno, ken kabaruan a panangidaulo, kasta met iti panangpatibker ti pampubliko a panangmanehar iti pinansia kadua dagiti component LGUS tapno mapagnumaran ti tunggal Elyucano.###
