BR LA UNION – Pormalen a nagtugaw kas baro nga Armed Forces of the Philippines (AFP) Chief of Staff ni Lt. Gen. Antonio Nafarrete.
Naisayangkat idi Kalman, Hulyo 21, ti turn-over of command ni Nafarrete kasukat ti nagretiro a ni General Romeo Brawner.
Naiturpos ni Brawner ti tallo a tawen a fixed term kas AFP Chief.
Indaulwan ni President Ferdinand Marcos Jr. ti turn-over ceremonies kadwa na ni Department of National Defense (DND) Secretary Gilbert Teodoro.
Imbinglay ni Brawner dagiti nagapwanan na ken pinagyamanan na ti amin a nakadwa na iti puwersa armada ti Pilipinas.
Iti met panagbetla ni President Marcos, imbaga na a mangnamnama nga ituloy ni Nafarrete dagiti napipintas nga accomplishment ni Brawner.
Kagiddan daytoy ket inyanunsiyo ti national defense ti pannakadutok ni Lt. Gen. Donald M. Gumiran nga agdama a commander ti Western Mindanao Command (Westmincom) kas commanding general ti Army kasukat ti naital-o a ni Nafarrete.
Naipasngay ni Nafarrete idi Pebrero 22, 1969. Ti ama na ket tubo ti Bani, Pangasinan bayat a ti ina na ket maysa a teacher manipud Ilolio.
Simrek iti Philippine Military Academy idi 1986 ken kabilang kadagiti nagturpos iti PMA “Bigkis-Lahi” Class of 1990.
Isuna ti maysa kadagiti immuna nga officers ti First Scout Ranger Regiment iti 10th Infantry Batallion idiay Zamboanga del Sur.
Nadutokan iti naduma-duma nga assignment kas iti Armed Forces’ Joint Special Operations Group ken Presidential Security Group ken indaulwan na pay ti external security para kenni sigud a President Benigno Aquino III.
Iti panagbetla ni Nafarrete ket siniguro na kadagiti suldado nga adda sungsungbatan da kadagiti umili ken itultuloy na a protektaran ti pagilian.
