Imbasura ni Department of National Defense Secretary Gilberto Teodoro Jr. iti kabaroan a panawagan manipud China nga ikkaten iti BRP Sierra Madre idiay Ayungin Shoal, ken impaganetget nga awan iti hurisdiksyon ti Beijing tapno makibiang ditoy Pilipinas.
Segun kenni Teodoro, naibasar iti United Nations Convention on the Law of the Sea (UNCLOS) ken international law dagiti aktibidad ti Pilipinas idiay Ayungin Shoal.
Sakbayna ket inakusaran manen ti Chinese Embassy iti Pilipinas a mangisaysayangkat kadagiti panagpirmis ken panangpatibker iti BRP Sierra Madre tapno maaddaan iti permanente a presensya iti lugar.
Imbatad met ti Department of Foreign Affairs (DFA) nga awan iti katulagan ti Pilipinas ken China tapno maobliga iti Maynila nga ikkaten wenno i-tow away iti barko.
Kinuna ti DFA a karaman iti Ayungin Shoal iti Philippine exclusive economic zone ken continental shelf.
Maibasar iti 2016 arbitral ruling babaen iti UNCLOS, maibilang iti Ayungin Shoal kas low-tide elevation nga adda iti uneg ti Philippine exclusive economic zone.
Inyunay-unay ni Teodoro nga awan metlaeng ti karbengan iti China a diktaran ti Pilipinas seknan ti presensya ti BRP Sierra Madre sadiay.
