BR LA UNION – Bimmaba iti critical low ti danum idiay Angat Dam, rason ti panagmaga iti sumagmamano a paset ti reservoir ken nangpataud ti panagdanag iti suplay ti danum idiay Metro Manila ken kabangibang a lugar.
Segun iti Philippine Atmospheric, Geophysical and Astronomical Services Administration (PAGASA), nairekord ti water level ti Angat Dam iti nasurok a 152 a metro above sea level, mas nababbaba iti minimum operating level a 156 metro ken adayo iti normal operating level daytoy a 180 metro.
Gapu iti agtultuloy a panagbaba ti lebel ti danum, rimwar iti nalawa a paset ti pitak kadagiti iti sumagmamano a lugar ti reservoir.
Segun iti PAGASA, kasapulan ti agtultuloy a panagtudo iti watershed tapno ngumato manen ti lebel ti danum.
Nakitaripnong metten iti lokal a gobierno ti San Jose del Monte, Bulacan kadagiti nadumaduma nga ahensiya ti gobierno tapno pagsaritaanda dagiti napaut a solusyon iti kumarkaro a kinakurang ti suplay ti danum.
Nagballaag metten dagiti awtoridad a posible a bumaba pay iti 149 metro ti water level idiay Angat Dam agingga agtapos ti lawas nu saan nga agtudo iti watershed.
