Nasaripatpatan manen dagiti dua a Mindanao bleeding-heart pigeon iti sakaanan ti Mount Hamiguitan Range Wildlife Sanctuary idiay Davao Oriental, segun ti Department of Environment and Natural Resources (DENR)-Davao.
Nakita dagiti billit kabayatan iti pannakaisayangkat ti Biodiversity Assessment and Monitoring System (BAMS) idi Hulyo 29, iti umuna nga opisial a dokumentasion ti species iti lugar sipud idi Agosto 8, 2019.
Sakbay ti nasao a dokumentasion, immunan a nakita ti maysa a biodiversity monitoring intern iti species iti kapada a lugar idi Hunyo ken Hulyo.
Naobserbaran met iti maysa a lalaki a Mindanao bleeding-heart pigeon a mangipakpakita ti courtship behavior iti maysa babai a billit, a posible a pagilasinan ti aktibo a panagpaado wenno breeding iti uneg ti sanctuary.
Segun ti DENR, ti Mindanao bleeding-heart pigeon (Gallicolumba crinigera) ket maysa nga endemic species ditoy Pilipinas – a masarakan idiay Mindanao, Basilan, Samar, Leyte, Bohol, ken Dinagat Islands, ken kadawyan nga agnanaed kadagiti kabakiran nga addaan ti nababa nga elevation.
Nakalanad ti species kas Vulnerable iti Updated National List of Threatened Philippine Fauna, gapu kadagiti pangta kas iti pannakapukaw ti pagtaengan ken ilegal wildlife trade.
Gapu ti daytoy, nagpanawagan ti DENR para iti naing-inget a panangipatungpal dagiti linteg kontra ti illegal wildlife trade ken agtultuloy a panangtaripato kadagiti natural a pagtaengan dagiti endangered animals.###
