BR LA UNION – Dinillaw ti sumagmamano a retirado a heneral ken opisyal dagiti medalya ken badges iti uniporme ti sigud a kongresista nga itan ket Philippine Air Force Reserve Brigadier General Mikee Romero.
Immuna ti daytoy, nagwaras iti social media ti ladawan ni Romero kadwa na ni AFP Chief of Staff Gen. Antonio Nafarrete, a nakadlawan dagiti netizen ken retirado nga opisyal nga ad-adu pay iti medalya ken tsapa a nakakabil iti uniporme ni Romero kas reservist kumpara iti mismo a hepe ti militar.
Impaganetget dagiti retirado a heneral ken opisyal a dagiti ipapaay a medalya ti militar ket pagrigatan ken saan a basta maited wenno maisuot nga awan ti nadagsen a basaran iti laban wenno serbisyo.
Kabayatanna, nainget met a pinaglibakan ni Romero dagiti alegasyon nga stolen valor.
Maibasar iti inruar na nga statement, kaatnuman ket saanna a kiniddaw wenno dinawat dagiti nasao a pammadayaw.
Innayon na nga amin a pammadayaw kenkuana ket boluntaryo a naipaay babaen kadagiti maseknan a sanga ti militar ken maibasar iti opisyal a merito ken serbisyo.
Segun met iti Philippine Air Force, mangisayangkat da ti panagamiris ken patibkeren da iti allagaden seknan iti panangipaay kadagiti pammadayaw ken panagsuot iti honorary badge ken insignia para kadagiti reservist tapno mamantinir ti integridad iti sistema ti pammadayaw ti militar.
