Pinarkmeken ni Queen of All Media Kris Aquino iti panagulimek mainaig iti dakes a komento kontra iti anak na a ni Joshua “Josh” Aquino, a karaman iti autism spectrum, nga inawagan da kas iresponsable ken resulta ti kinakurang ti pannakaammo.
Iti social media post na, inlawlawag ni Kris a pinili na a saan a patulan iti kontrobersiya tapnu saanen a dumakkel ken maikkan ti pansin dagiti tao nga adda ti likudan dagiti komento.
Nangrugi iti saritaan kalpasan nga awagan ti “walang kuwenta” ni Josh ti maysa kadagiti host ti podcast a Machong Chismisan iti maysa nga episode a napauluan ti “Ang Pagbabalik ni Kris Aquino.”
Imbinglay met ni Kris iti panangaywan ken panagayat nga ipakpakita ni Josh kenkuana bayat nga agpapaimbag isuna kadagiti autoimmune disease.
Kinuna na a kadua na iti anak ti inaldaw-aldaw ken tumultulong daitoy iti panangaywan kenkuana.
Kabayatanna, nagwaragawag met ti suporta kenni Josh dagiti gagayyem ken tagasuporta ni Kris, kasta met dagiti sumagmamano nga ahensiya ti gobierno ken dagiti organisasyon a timmakder kontra iti pananguyaw kadagiti persons with disabilities (PWDs) ken iti panaglabsing ti dignidad da.
