BR LA UNION – Nagpanawagan ni Interior Secretary Jonvic Remulla idiay Kongreso nga irutan pay iti agraraira a gun laws wenno linteg maipapan iti panagikot ti paltog ditoy pagilian, kasaruno ti nakaam-ames a pammaltog idiay Ateneo de Zamboanga University a nakatayan ti dua nga estudyante.
Insingasing ni Remulla a patawan ti criminal liability wenno direkta a pagsungbaten dagiti gun owner a saan a mangidulin a nasayaat kadagiti armas, nangruna nu mausar iti maysa a krimen.
Impaganetget ti sekretaryo a saanen nga umdas nga ibilang laeng a “reckless imprudence” iti sungsungbatan ti agtagikua iti paltog nangruna no nausar ti paltogda iti pammapatay wenno dadduma pay a naranggas a krimen.
Maibasar iti datos a nakalap ti DILG, agpada a service firearms dagiti nausar iti insidente ti pammaltog iti pagadalan idiay Zamboanga City ken Tacloban City kadagiti napalabas a bulan, a nakatayan ti tallo nga estudyante ken 20 dagiti nasugatan iti naud-udi a kaso.
Impaganetget pay ti sekretaryo a panawenen tapno marepaso ti Republic Act No. 10591, wenno ti Comprehensive Firearms and Ammunition Regulation Act.
Kinuna na a kurang ken saan a nalawag ti agdama a linteg nu maipapan iti pannusa kadagiti agtagikua ti paltog a maduktalan a nagbaybay-a ken nangipaulbos nga usaren ti sabali a tao iti armas da iti krimen.
Impanawagan pay ni Remulla nga aramidn a non-bailable offense wenno awan ti piyansa ti kaso a possession of loose firearms, nga isuti kangrunaan a maus-usar kadagii krimen ditoy pagilian.
