BR LA UNION – Saan a bumaba iti 37 a tattao dagiti nasugatan kalpasan a timmama ti magnitude 5.9 a ginggined idiay Eastern Japan ita nga aldaw ti Domingo, ken narikna ti napigsa a panagdayyeg agingga idiay Tokyo.
Segun iti Japan Meteorological Agency, ti ginggined ket addaan iti kauneg a 70 a kilometro, ken nakita ti sentro ti gingined idiay southern Ibaraki Prefecture.
Kaaduan kadagiti nadangran ket natinnagan iti furniture wenno muebles ken ridaw kalpasan a kellaat a nariing dagitoy ken nagbutengda gapu iti panagdayyeg.
Iti pakabuklan a bilang, 15 ti nasugatan idiay Tokyo, siyam idiay Saitama, walo idiay Kanagawa, uppat idiay Chiba ken maysa met idiay Ibaraki.
Maysa nga 80-anyos a nataengan ti nagsagaba ti nakaru a pannakadangran iti patong kalpasan a natinnag manipud iti katre idiay Yokohama.
Nanggubway pay ti gingined iti pannakaitantan ti sumagmamano nga express ken local train services, nga agbi-biyahe agturong idiay Tokyo ken Narita Airport. Nupay kasta, normal ti operasyon ti Shinkansen bullet trains.
Awan met ti pangta ti tsunami ken awan ti naipadamag a problema iti nasurok kumurang maysa dosena a nuclear power plants iti nasao a pagilian.
Maysa nga underground water pipe iti Koto district idiay Tokyo ti nadadael gaputi gingined, ngem dagus met laeng a natarimaan.
