Mapatta-patta a 17,300 a residente wenno 4,622 a pamilya idiay Pampanga ti agdama nga adda kadagiti 270 nga evacuation centers iti intero a probinsya gapo iti nalawa a panaglayus.
Segun kenni Pampanga Governor Lilia Pineda, saan pay a karaman iti datos dagiti residente nga agtaltalinaed kadagiti pagtaengan da gapo iti nangato a danum ti layus.
Kinunana ket uray dagiti lugar a saan a kadawyan a malaylayus ket apektado payen gapo iti backflow ti danum a saan a dagos a makaruar agturong ti Manila Bay.
Maysa kadagiti apektado la unay ket ti San Simon, nu sadinno ket nalayus dagiti adu a barangay ken paset ti North Luzon Expressway (NLEX). Narigat met nga payasyasan iti danum agsipud ta agrikrikos laeng daitoy iti lugar.
Agtultuloy ti koordinasyon iti probinsyal a gobierno kadagiti Mayores ken opisyales ti barangay tapno unaen iti panagbakwit, addan sakit, senior citizens, ken bedridden a residente.
Pinaregta manen ni Pineda dagiti residente a tungpalen dagiti pakdaar ti gobierno ken mangisagana iti emergency plan tapno masiguro iti kinatalged iti tunggal pamilya.
