BR LA UNION – Nagresulta iti nabara a diskusyon iti panangkontra ti depensa ken prosecution iti testimonya ti financial forensic analyst expert a ni Atty. Alex Cabrera sakbay a nagleppas ti panagdengngeg iti maika-38 nga aldaw ti impeachment trial ni Vice President Sara Duterte itay malem, Oktubre 12, 2026.
Iti panangtratar ti Article II ti impeachment complaint, inawagan ti defense lead counsel a ni Atty. Sheila Sison nga “erroneous” wenno biddut dagiti konklusyon nga inlanad ni Cabrera, nga adda pakainaiganna iti alegasyon ti unexplained wealth wenno saan a mailawlawag a kinabaknang kontra iti bise presidente.
Segun kenni Sison, maipagarop a naipaayan iti testigo ti nalawa a gundaway tapno ilanad dagiti konklusyon na, ngem impaganetget ti depensa a biddut iti conclusions of law and fact ni Cabrera.
Gaputi dayta, kiniddaw ni House prosecutor Atty. Chel Diokno iti impeachment court nga ikkaten iti rekord ti sarita nga “erroneous,” gaputa maysa daytoy kunana a konklusyon iti isyu ti linteg, ket pagukuman laeng kunana ti rumbeng nga agdesisyon nu awaten dagiti opinyon ni Cabrera.
Nupay kasta, nagkedked ni Sison iti mosyon ni Diokno, banag tapno maaddaan ti diskusyon iti agsumbangir a benneg.
Naisentro ti diskusyon iti panangiladawan ti depensa iti testimonya ni Cabrera nga “erroneous”, bayat ti panangusig ti impeachment court kadagiti alegasyon a nakapauneg iti Article II ti impeachment complaint kontra kenni Duterte.
