Nangipataw iti Philippine Competition Commission (PCC) ti pakabuklan a ₱1.76 bilyon a multa kadagiti sumagmamano nga importer ken trader ti sibuyas gapu iti maipagarop a sabwatan a nangigubuay ti panagngato ti presyo ti lokal a sibuyas iti aganay ₱800 kada kilo idi 2022.
Karaman kadaitoy iti maysa a freight forwarder, cold storage operator, dagiti importer ti sibuyas, dagiti opisyal ken dagiti managtagikua ti kumpanya a karaman iti maipagarop a panaglabsing iti Philippine Competition Act.
Segun iti PCC, natakuatan iti naisayangjat a raid nga imbilin ti korte idi Setyembre 2023 a maipagarop a nangusar iti freight forwarder ti nagduduma a nagan ti korporasyon iti panagala dagiti permit para iti panag-angkat ti sibuyas.
Gapu iti daitoy, nakontrol dagiti respondent iti aganay 50 porsiyento ti amin nga aprubado nga import clearance para iti nalabbaga ken duyaw wenno puraw a sibuyas idi 2020 ken 2021.
Dagiti naangkat a sibuyas ket naiyakar kadagiti cold storage facility sakbay a naiwaras kadagiti nadumaduma a paset ti pagilian.
