Awan ti nakita nga aktibidad ti hoarding kadagiti sibuyas ti Department of Agriculture (DA).
Kinuna ni Agriculture Secretary Francisco Tiu Laurel nga ininspeksyon da kadwa ti Bureau of Plant Industry dagiti bodega ti sibuyas sadiay Southern Tagalog ken Central Luzon ken nakita da nga adda laeng ti nabatbati a 500 metric tons nga stocks ti red onion.
Insayangkat da ti inspeksyon gapo iti kellat a panagngato ti presyo ti sibuyas nu sadino ket dumanon daitoy ti agingga P200 kada kilo.
Namnamaen ti DA a maipababa ti presyo ti red onion inton bulan ti Marso ken Abril agsipud ta dagitoy nga bulan ti panagaapit.
Kabayatanna, nakatuding met a sumangpet dagiti naangkat a sibuyas kadagiti sumaganad nga aldaw.
