Mangisayangkat ti Bureau of Plant Industry (BPI) ti inspection kadagiti bodega ti sibuyas tapno ammoen nu adda ti mapaspasamak a hoarding wenno panangilemmeng kadagiti supply.
Daitoy ket kasaruno metten ti pammilin ni Agriculture Secretary Francisco Tiu Laurel Jr a bisitaen na ti amin a cold storage facilities ditoy pagilian a nakaimbakan dagiti sibuyas.
Segun iti BPI, kasapulan a maamoan nu maiduldulin dagiti baro nga apit a sibuyas imbes a maiturong dagitoy iti merkado.
Manamnama a malpas ti ahensya dagiti serye ti inspeksyon ti las-ud ti uppat agingga makalawas.
Segun met iti Department of Agriculture (DA), apaman matakuatan a maiduldulin dagiti bulto ti sibuyas, maibilang daitoy kas hoarding ken panangmanipula ti presyo.
