Pinaatiddog dagiti grupo dagiti agtartaraken iti baboy iti maysa pay nga aldaw ti insayangkatda a Pork Holiday a nangrugi idi Huebes, Oktubre 22, tapno ipaganetget ti dagus a pannakaipatungpal ti temporary import ban ti karne ti baboy ditoy pagilian.
Pinasingkedan daytoy ni Agricultural Sector Alliance of the Philippines (AGAP) Party-list Representative Nicanor Briones iti press briefing kasaruno ti peaceful rally-da iti sango ti opisina ti Department of Agriculture.
Segun kenni Briones, ti tarigagay ti panawaganda ket tapno maikkan dagiti lokal nga agtartaraken ti baboy iti gundaway a makabangon iti kanayon a pannakalugi gapu iti iseserrek dagiti imported a karne ti baboy ditoy pagilian.
Impaganetget ti grupo a mapaatiddog ti import ban iti uppat agingga iti lima a bulan pakairamanan ti amin a paset ti baboy, kas iti liempo ken kudil, tapno malapdan ti technical smuggling.
Kinunana a no saan a dagus a maaksyunan ti gobierno iti panawagan, ket mabalin a dumanon iti binilion a pisos ti lugi dagiti lokal nga hog raisers.
Panggep pay ti Pork Holiday nga ipakita iti gobierno ti posible nga epekto iti suplay ti karne no agsardeng dagitoy nga aglako.
Nagballaag pay ti grupo a no saan a maited ti dagus a solusion ti parikutda, posible a mapilitan nga agserra ti adu a negosio a mainaig iti industria ti karne ti baboy iti sumaruno nga innem a bulan.
Saan laeng a dagiti agtartaraken iti baboy ti mabalin a maapektaran iti kasasaad no di pay ket dagiti konsumer, a mabalin a marigatan a gumatang iti karne no ngumato ti presio kadagiti merkado.
Inallukoy ti grupo ti gobierno nga ipangruna ti pagsayaatan dagiti lokal nga agtartaraken ti baboy imbes nga ipangruna ti interes dagiti dadakkel a negosyante, a makitkitada a maysa kadagiti lapped iti dagus a pannakaipatungpal ti kiddaw a pannakaiparit ti panagangkat.
Manamnama met a marikna ti epekto ti sales freeze iti suplay ti karne ti baboy kadagiti sumarsaruno nga aldaw.
