Agtultuloy ti panawagan ni Navotas City Rep. Toby Tiangco a maipasan ti Citizen Access and Disclosure of Expenditures for National Accountability (CADENA) Act tapno mapatibker ti transparency ken ti pagsungsungbatan iti gobierno.
Segun kenni Tiangco, ti kinakurang ti transparency iti panaggasto iti pondo ti publiko ti mangpatpataud iti panagduadua dagiti umili kadagiti opisyales ti gobierno.
Babaen ti panangusar iti teknolohia a blockchain, tarigagay ti singasing nga ikkan ti publiko iti access tapno masubaybayan no kasano a magastos dagiti pondo.
Mainayon pay, manamnama a mapapigsa ti singasing dagiti institusion ken panagtalek ti publiko iti gobierno.
Kadua da Marikina Rep. Marcy Teodoro ken Sen. Bam Aquino, nagpanawagan dagitoy ti aksiyon ti Kamara iti nasao a singasing, a naaprobaranen iti maikatlo ken maudi a pannakabasa idiay Senado.
