Nangipilan ti House prosecution panel ti formal offer of evidence kontra kenni Bise Presidente Sara Duterte mainaig iti Article 2 ti impeachment complaint, segun kenni House prosecution spokesperson Robert Ace Barbers.
Iti maysa a news forum ita a Sabado, kinuna ni Barbers a naikapet iti submission dagiti dokumento ken testimonia dagiti testigo a mapapati a mangpaneknek iti alegasion ti saan mailawlawag a kinabaknang ni Duterte a saan a naideklara iti Statement of Assets, Liabilities and Net Worth wenno SALN-na.
Adda met iti sangapulo nga aldaw ti kampo ti Bise Presidente nga agkomento sakbay nga ikeddeng ti Senate impeachment court no awatenna dagiti ebidensia.
Nangipeksa ti kumpyansa ni barbers nga umdasen dagitoy tapnu magun-od iti conviction iti impeachment trial.
Malagip a nagsardengen ti House prosecution panel a mangidatag iti ebedensiya manipud idi Oktubre 13, kalpasan nga inusarda ti 39 kadagiti 62 nga aldaw a naituding para iti presentasionda.
Immuna pay nga inikkat ti panel ti tallo pay nga artikulo ti impeachment complaint a mainaig iti confidential funds, bribery ken ti mapapati a nakaro a panagpangta kontra kenni Presidente Ferdinand Marcos Jr. ken ti pamiliana.
