Inallukoy dagiti senador manipud iti minority bloc ni Presidente Ferdinand “Bongbong” Marcos Jr. ken dagiti maseknan nga ahensia a makisaritada iti legal team ni Senador Ronald “Bato” Dela Rosa tapno magun-od iti natalna a resolusion iti baet dagiti addang tapnu maipatulod daytoy iti International Criminal Court (ICC).
Daytoy ket kasaruno ti panangideklara ni Interior Secretary Jonvic Remulla kenni Dela Rosa a kas “armado ken napeggad” ken nangitukon ti ₱50-milion a gunggona para iti impormasion a mangiturong iti pannakatiliwna.
Iti joint statement ita Sabado, kinuna ti minority bloc a maawatanda ti tarigagay ti gobierno a mangrisut iti kasasaad tapno mataginayon ti urnos, ngem patienda a maragpat daytoy iti wagas a mangraem iti linteg ken mangsalaknib iti biag.
Innayon pay ti grupo a nakasaganada a tumulong iti dialogo tapno masigurado a masalakniban ti karbengan ni Dela Rosa ken maituloy ti panagbirok iti hustisia.
Inawatda pay ti kinuna ni Remulla a kayatna a maliklikan ti pannakadangran, kagiddan ti panawagan iti amin a dasig a mangipakita iti panagteppel ken pagtalinaeden a silulukat ti komunikasion.
Immun-unan a nagballaag ni Remulla a mabalin a matay ti agingga iti 10,000 a tattao no kaspangarigan maiyusuat ti pannakakemmeg ni Dela Rosa.
Gapu iti daytoy, inallukoy dagiti senador iti ehekutibo, dagiti otoridad, ni Dela Rosa, ti pamiliana ken dagiti abogadona, kasta met dagiti mangsupsuporta kenkuana, nga agtitinnulongda tapno maliklikan ti kinaranggas ken marisut ti kasasaad iti natalna a wagas.
