SAN JUAN, LA UNION — Nagbalin a strikto dagiti awtoridad ken nagduduma a sektor ti coastal community iti San Juan, La Union maipapan iti panagtitinnulong tapno ipasigurado iti kinatalged dagiti residente ken turista iti panangisayangkat iti La Union Surfing Break 2026.
Kabinnulig iti kinatalged ken annayas iti Philippine National Police (PNP), Bureau of Fire Protection (BFP), Philippine Coast Guard Auxiliary, La Union Surf Club, dagiti lifeguards, coastal barangays, ken resort owners.
Segun kenni San Juan Municipal Disaster Risk Reduction and Management Officer Gino Osvi Mabalot, ikonkonsidera dagiti maseknan ti pabaliw-baliw a kondisyon ti dalluyon ti nagduduma nga oras iti aldaw, tapno maibatog iti kondisyon iti baybay dagiti surfing activities.
Manamnama met iti kaado dagiti bumisita a turista idiay San Juan mangrugi inton Biernes, Oktubre 30, nangruna ket nagiddan iti Undas Break ken iti Surf Break. Gapo kadaitoy ket napateg iti koordinasyon kadagiti stakeholders tapno nannayas a maimaton iti panagdudupudop ti tattao.
Maibasar iti impormasyon nga inbinglay iti lokal a gobierno ket makabulan sakbay iti event ket nirugianen iti San Juan LGU, kabinnulig iti Municipal Tourism Office, ken Provincial Government of La Union, ti panagsagana para kadagiti aktibidad ken dadduma pay a kasapulan para iti kinatalged.
Iti manamnama a panagsangpet dagiti bisita, maallukoy iti publiko a tungpalen dagiti allagaden dagiti lokal nga awtoridad, agdengngeg kadagiti lifeguards, ken liklikan iti aglangoy nu napeggad iti kondisyon dagiti dalluyon.
