Pinainget pay ti agdama a ceasefire ti intero a rehion ti Kherson sadiay makin-abagatan a paset ti Ukraine tapno mapatulodan ti taraon ken agas dagiti umili iti siudad ti Oleshky nga agdama nga adda iti sidong ti kontrol iti Russia.
Mapattapatta a dua ribu nga umili ti adda iti nasao nga siudad nga awan ti supply iti koriente, danum ken taraon kalpasan a madadael ti Kakhovka Dam idi tawen 2023 ken napalitmutan iti bomba ti amin a kalsada.
Ti pannakapaatiddog ti katulagan ket inaramid da US First Lady Melania Trump ken Pope Leo XIV tapno mangipaay iti natalged a panaglabas kadagiti humanitarian convoys agingga inton Nobiembre 1.
Agpada nga inwaragawag ti agsumbangir a dasig a sinurotda ti katulagan, nu sadino nga inawagan daytoy ni David Arakhamia manipud iti parlamento ti Ukraine a kadakkelan a de-escalation ti panagdadangadang sipud idi tawen 2022.
Nangrugi metten ti Engineering reconnaissance ken panangikkat kadagiti explosive device dagiti militar tapnu makaipatulod iti tulong ken mangisayangkat ti pormal nga evacuation inton bigat Biyernes.
Kabayatanna, nagpakdaar ni Presidente Volodymyr Zelensky ti Ukraine maipapan iti seguridad dagiti umili bayat nga agtultuloy ti pannakatarimaan dagiti kalsada a nadadael iti igid ti Karayan Dnipro.
