Inwaragawag ni Presidente Ferdinand Marcos Jr ti libre a toll fee agingga iti ngudo ti tawen inton Disiembre 31, 2026.
Manamnama a mabenepisiaran dagiti motorista iti pannakalukat ti NLEX-C5 Northlink Segment 8.2 Section 1A.
Segun iti Presidente, dakkel a bang-ar daytoy kadagiti motorista nangruna ta umas-asideg ti panawen ti bakasion.
Ita nga aldaw ti Huwebes, indauluan ni Presidente Ferdinand “Bongbong” Marcos Jr. ti pannakalukat ti baro a paset ti expressway, a tarigagay a mapapartak ti panagbiahe iti nagbaetan ti Quezon City ken Valenzuela City.
Agarup dua a kilometro ti kaatiddog ti baro a paset ken mangisilpo iti Mindanao Avenue ken Quirino Highway.
Manamnama a makatulong daytoy a mangkissay iti trapiko kadagiti dadakkel a kalsada ken mangipaay kadagiti motorista iti alternatibo a ruta.
