Mariknan dagiti aggat-gatang iti panagngina ti presyo dagiti sabong idiay Dangwa, Manila, a kangrunaan a ‘bagsakan’ ken sentro ti paglakwan iti nalak-laka a presyo dagiti sabong iti intero a Metro Manila.
Maipagarop a doble ita ti presyo dagiti sabong nu ikumpara iti napalabas nga Undas, segun kadagiti aggat-gatang a nakauman ti Bombo Radyo.
Ni Gethsamane Viuya, a nagbiyahe pay manipud Tarlac, ket aminado a nadagsen iti bulsa ti presyo dagiti sabong.
Ngem gumatang latta kunana tapno isagut kadagiti pimmusayen nga ipat-pateg na iti biag, nangruna ket maminsan laeng daytoy ti makatawen.
Kabayatanna, imbaga met ni Julia Arca, maysa a flower vendor idiay Dangwa, nakapsot pay laeng ti panaglakwan laksid a tallo laengen nga aldaw sakbay ti Undas.
Segun kenni Arca, posible pay a manayunan ti P20 agingga P100 iti presyo dagiti sabong iti sumaganad nga aldaw, depende iti klase ken kaadu dagitoy, kagiddan ti manamnama a panagngato ti presyo manipud kadagiti pagal-alaan da.
Iti agdama, iti rajan ken orchid iti sumagmamano kadagiti kangrunaan a gat-gatangen dagiti buyers, nga agbalor ti P200 agingga P250.
Kay-kayat daytoy dagiti aggatang agsipudta saan unay a dakkel ken nalag-an a bit-biten nu agturong iti sementeryo, a namnamen a dupodop ti adu a tattao.
Dadduma pay a kangrunaan a gat-gatangen dagiti umili ket Malaysian mums nga agbalor ti P150; rosas ken centerpiece a mangrugi iti P500, pompom nga umabot iti P1,000 ken tropical flowers a P1,500.
Namnamaen ti ad-adu a tattao nga aggatang, maysa nga aldaw sakbay iti Undas wenno iti mismo a kaaldwan daytoy a Nobyembre uno.
