Inapreciar ti Department of Agriculture iti preventive suspension ti Ombudsman kadagiti tallo a DPWH officials seknan iti maipagarop a “ghost” farm-to-market road projects idiay Davao Occidental.
Idi Mayo 21, nangidatag iti ahensiya ti reklamo kontra iti sumagmamano a DPWH officials ken private contractors gapu iti walo a farm-to-market road projects nga agbalor ti nasurok P94 milyon.
Segun iti DA, naideklara a nalpasen ken fully paid ti sumagmamano a proyekto ngem iti kinapudno na ket saan pay a kumpleto.
Iti maysa a proyekto, naipadamag a 100-percent complete, nairuar ti sibubukel a bayad wenno pondo idi pay 2023 ngem agtultuloy pay laeng a maar-aramid.
Naipasidong iti preventive suspension agingga innem a bulan da DPWH officials James Ryan Jabonero, Jonathan Relacion, ken Zesrel Cuga bayat nga agtultuloy iti proceedings iti kaso.
Segun kenni Agriculture Secretary Francisco Tiu Laurel Jr., napateg a masiguro a pagnumaran dagiti mannalon ken mangngalap dagiti farm-to-market road agsipudta makatulong dagitoy iti pannakaibaba ti gastos iti transportasyon ken papartakenna ti pannakaiturong dagiti produkto iti merkado.
Impaganetget ti DA, rumbeng a masiguro a maus-usar iti umno a nakairantaan iti pondo para iti imprastraktura.
