Nasentensiaan ti tungpal-biag a pannakaibalud iti maysa a babai a Thai national kalpasan a mapaneknekan a nagpuslit ti ilegal a droga ditoy Pilipinas.
Segun iti Philippine Drug Enforcement Agency (PDEA), napaneknekan a guilty ni Sirirut Taweesup iti panaglabsing ti Section 4, Article II ti Republic Act No. 9165 wenno Comprehensive Dangerous Drugs Act of 2002, maibasar iti 14-pages a desisyon ti Regional Trial Court Branch 116 idiay Pasay City.
Malaksid ti nasao a pannusa, nabilinan met isuna nga agbayad ti multa a P2 milyon.
Naglabsing pay isuna ti Republic Act No. 10863 wenno Customs Modernization and Tariff Act, isu a napaulugan pay isuna ti pannakaibalud ti walo a tawen ken maysa nga aldaw kas minimum agingga 12 tawen kas maximum, ken multa a P5 milyon.
Naarestar ni Taweesup idi Agosto 14, 2024, kalpasan a simmangpet idiay Ninoy Aquino International Airport (NAIA) manipud Samut Prakan Province, Thailand. Narekobre iti kustodiya na iti 13,169 a gramo ti dried leaves of cannabis nga aggatad ti P18,436,600.
Kinuna ni PDEA Director General Isagani R. Nerez, ipakpakita ti hatol iti agtultuloy a panagsikap dagiti otoridad a pagsungbaten dagiti karaman iti panagpuslit ti ilegal a droga ditoy pagilian.
Impasigurado met ni Nerez a parigtaen ti ahensya iti kampanya kontra ilegal a droga ken iti seguridad kadagiti borders tapnu malappedan iti panagserrek dagiti maiparit nga agas ken maprotektaran iti publiko.
