Kayat ni Senate President Pro Tempore Vicente “Tito” Sotto III ti maaddaan iti nalawag a pagannurotan a mangtaming iti napaut ken saan nga autorisado a kaawan dagiti senador iti trabahoda.
Daytoy ket kalpasan nga inpila ni Sotto ti Senate Resolution No. 751 a mangidawdawat iti Senate Committee on Rules a mangrepaso kadagiti agdama a polisia ken mangirekomendar kadagiti addang a mangtaming iti prolonged unauthorized absences dagiti miembro ti Senado.
Iti resolusion, impaganetget ni Sotto a ti panagtengngel iti pampubliko a posisyon ket maysa a panagtalek nga inted dagiti umili, isu a rumbeng nga agbalin a responsable dagiti nabutusan nga opisial ken aramidenda dagiti trabahoda.
Segun iti resolusion, agbalbalin a problema ti napaut nga absences gapu ta mabalin a saanen a makapartisipar ti maysa a senador iti napateg a trabaho iti Senado.
Nadakamat pay iti singasing dagiti reklamo a naipila kontra iti sumagmamano a senador gapu iti kaawan dagitoy, ngem makuna nga awan ti nalawag a probision iti Senate Rules no kasano a mataming daytoy.
Gapu iti daytoy, kayat ni Sotto ti maaddaan iti nalawlawag a mekanismo tapno masigurado nga agtalinaed nga accountable dagiti senador kadagiti pagrebbenganda kas pannakabagi ti umili.
