Nakagun-od ti panagraem iti kinse anyos a surfer manipud La Union a ni Mara Lopez manipud iti World No. 1 a ni Molly Picklum ti Australia gapu iti impamatmatna a laing ken siglat iti surfing.
Daytoy ket kalpasan ti panaglaban da iti World Surf League (WSL) Championship Tour Philippines Pro idiay Cloud 9, Siargao Island idi Domingo, Nobyembre 1, 2026.
Ni Lopez, a national champion ken maysa kadagiti nangibagi iti pagilian para iti World Surf League (WSL) ket inabak ti Australian surfing champion, iti Round 1 (Heat 5) idi bigat ti Domingo.
Nakagun-od ni Lopez ti 4.50 a puntos bayat a ti nangabak a ni Picklum ket nakaaramid ti 11.50 a puntos.
Nupay nasapa a na-eliminate ni Lopez iti umuna pay laeng a round ti kompetisyon, na-impress met ni Picklum iti laing ken kabaelan ti agtutubo a surfer, agsipudta nakita na iti kinalaing daytoy nga ag-surf ken nalaing pay iti longboard.
Para kenni Mara Lopez, ibilang na a dakkel a kapadasan ken oportunidad a nakalabanna iti maysa kadagiti kasisiglatan a surfer ditoy lubong, malaksid pay ti panang-raem kenkuana ti mismo a World No. 1.
Pattien met ni Molly nga agserbi nga inspirasyon ni Mara kadagiti dadduma pay nga agtutubo a na-essem ti surfing.
