Inwaragawag ni Atty. Neri Colmenares iti eksklusibo nga interview ti Bombo Radyo a marigatan a kombinsiren ti impeachment court kadagiti isango a testigo ti depensa gapu ta agserbi laeng dagitoy a kas secondary witnesses.
Segun iti human rights lawyer, dakkel a karit para iti depensa gapu ta kinunana a maibilang a kurang iti direkta a pannakaammo dagiti nasao a testigo kadagiti alegasion ti Article 2 mainaig iti saan a mailawlawag a kinabaknang a dumanon iti P800 million agingga iti P1.5 billion.
Malagip nga immun-unan a nag-withdraw ti maysa kadagiti 20 a naipasa a testigo ti kampo a ni Dean Ralph Sarmiento.
Innayonna pay nga imbes a mangnamnama kadagiti secondary witness, insingasingna nga ad-adda nga epektibo ti panagparang ni Bise Presidente Sara Duterte iti hearing tapno direkta a mangilawlawag iti publiko ken iti korte.
Inlawlawagna pay, gagangay a ti maysa nga indibidual a mangtaktakder iti kinainosentena ket boluntario nga agtestigo gapu ta kayatna a personal a kombinsiren ti korte babaen ti pananglawlawagna a direkta kadagiti alegasion.
Nupay kasta, binigbig met ni Colmenares dagiti kasukat a peggad ti panagsango ni Duterte, nangruna no adda dagiti saludsod a marigatan a sungbatan wenno mailawlawag babaen ti ebidensia maipapan kadagiti isyu ti kuarta.
Agsubli ti hearing iti impeachment trial inton Lunes, Nobiembre 9, tapno idatag ti depensa dagiti testigo ken ebidensia konytra kadagiti akusasion.
