Nangipamatmat manen ti nakakas-kasdaaw a laing iti Filipina tennis star a ni Alex Eala kalpasan nga immabante iti finals ti 2026 Hong Kong Tennis Open a nangmarka iti maikadwa a professional circuit final na ita a tawen.
Nagun-od ni Eala iti baro a ballaygi kalpasan nga inabak na iti maysa a napinget a laban iti world No. 9 a ni Maria Sakkari ti Greece iti skor a 7-5, 3-6, 6-4.
Laksid dagiti nailista a weather delays iti tengnga ti ay-ayam, nangipamatmat ti natibker a determinasyon ni Eala tapno maiwagsit ti pannakapaay na iti maikadwa a set ken maipatungpal ti panangabak na kontra kenni Sakkari .
Iti napnuan pakasaritaan a ballaygi ni Eala ket maibilang a career-best win na agingga iti agdama, a lalo a nangital-o iti profile na iti sangalubongan.
Maipalagip nga immuna a simmikat ni Eala ita a tawen idi magun-od na ti maiden professional singles title iti naisayangkat a W50 Pune idiay pagilian nga India.
Nakatuding a lumaban ni Eala iti 2022 US Open girls’ singles winner a ni Claire Liu ti Amerika ken agdama a paset ti top 100 globally para iti tar-tarigagayan a korona idiay Hong Kong.
Iti prestihiyoso a torneyo a maysa a WTA 250 event ket lalo a nangpaneknek a nakasagana dagiti atleta a Pilipino a maki-ginniddan kadagiti nalalaing ditoy lubong ken mangipaay ti dakkel a pakaidayawan ti pagilian.
