Kinarit ni Senator-judge Robin Padilla iti prosekusyon ti impeachment trial ni Vice President Sara Duterte nga imbestigaran met iti panagbiag ken panaggastos dagiti agpanpanday-linteg iti Kamara, partikular dagiti maipagarop a nangingina a lugan nga aggatad ti P16 milyon agingga P22 milyon.
Daitoy ket kalpasan a talantanen ti prosekusyon iti panaggatang ni Atty. Manases “Mans” Carpio, asawa ti bise presidente, dagiti sapatos nga aggatad ti P256,882 idiay Malaysia, mainaig ti saritaan iti simple a panagbiag dagiti opisyal ti gobierno.
Kinuwestiyon ni Padilla iti panagpamaysa iti nasao a panaggatang ken impaganetget a rumbeng met a sukimaten iti panaggastar dagiti dadduma nga opisyal.
Imbinglay met ti senador a gimmastos isuna ti nasurok-kumurang P900,000, karaman iti tulong kadagiti biktima ti pammaltog idiay Tacloban ken South Cotabato, ken kinarit iti prosekusyon nga imbestigaran nu ania iti nagusaran na daitoy.
Kinuna ni Padilla, rumbeng nga agbalin a patas iti panagsukimat kadagiti panagbiag ken panaggastos kadagiti amin nga opisyal ti gobierno, aniaman iti posisyon da.
