Mangitukon iti International Football Federation (FIFA) ti 25 milyon a dolyar wenno nasurok P1.6 bilyon para iti panangpapigsa ken panangparang-ay ti football ditoy Pilipinas.
Kasaruno iti panagpirma ti Memorandum of Agreement (MOA) ti FIFA, Philippine Sports Commission (PSC), ken Philippine Football Federation (PFF), kadua isuda FIFA President Gianni Infantino, Executive Secretary Ralph Recto, PSC Chairman Patrick Gregorio, ken PFF President John Gutierrez.
Iti nasao a pondo, 13 milyon a dolyar wenno nasurok P831 milyon iti maitukon para iti rehabilitasyon ti Rizal Memorial Football Stadium, nga awan iti mausar a pondo manipud iti gobierno.
Segun iti PSC, mangrugi iti umuna a paset ti 2027 iti panagurnos ti pasilidad tapnu nasaysayaat iti panangisayangkat dagiti international football competitions.
Kabayatanna, kinuna ni Infantino a napateg iti akem ti stadium agsipudta agserbi daitoy kas venue para kadagiti lokal ken international football players ken mangited-dalan iti nalawlawa a panakaammo iti Pilipinas iti tay-ak ti football.








