Imbatad Presidente Ferdinand “Bongbong” Marcos Jr. a magulgulwan dyaytoy maipapan kadagiti naiyusuat a tignay- protesta kontra iti inisyatiba a Pax Silica ti Estados Unidos.
Segun iti Presidente, awan pay ti naisapinal nga aniaman a katulagan maipapan iti nasao nga inisyatiba ken awan pay ti napasamak a panagpirma, isu a kinunana a mariribukan daytoy kadagiti protestang a naisayangkat kontra iti nasao a proyekto.
iti maysa a press conference idi kalman Biyernes kalpasan ti 33rd APEC Economic Leaders Meeting sadiay Shenzen, China, impaganetget ni Marcos a saan nga akem iti sidong ti inisyatiba ti panangipatakder kadagiti data center iti pagilian.
Innayonna pay, a ti tarigagay laeng ti proyekto ti mangpalawa ti technological products ken pannakipaset ti Pilipinas iti ekonomiya maipapan iti artificial intelligence.
Kinunana pay a daytoyen ti gundaway ti pagilian nga agbalin a paset ti panangsukog iti global artificial intelligence (AI) industry imbes nga agbalin laeng a konsumer kadagiti produkto iti daytoy.
Inallukoy pay ti presidente ti pagilian nga awaten dagiti kastoy a proyekto ken gannuat gapu kadagiti mabalinna a maipaay a kontribusion iti ekonomia ti Pilipinas, Southeast Asia ken iti intero a lubong.
Kadagiti napalabas a lawas, rinibu a tattao ti nagprotesta iti nadumaduma a paset ti lubong a maibusor iti Pax Silica initiative ti US gapu iti pangta daytoy iti aglawlaw ken natural resources.
Kimmaro pay dagiti panawagan para kadagiti protesta bayat ti kangitingitan ti maika-49 nga ASEAN Summit ken ti kaadda ni US President Donald Trump iti pagilian.











