Dinepensaan ti kampo ni Senador Ronald “Bato” Dela Rosa a saan a pammaneknek ti panaglabsing iti panagawat ti Senate Ethics Committee mainaig iti reklamo a naipila kontra iti agpanpanday-linteg.

Segun iti abogado daitoy a ni Atty. Israelito Torreon, iti panangideklar a “sufficient in form and substance” iti reklamo ket paset laeng ti proseso tapnu pormal daitoy a maipatulod iti senador ken maikkan isuna iti gundaway a sumungbat.

Pinasingkedan pay ni Torreon a naawaten ti opisina ni Dela Rosa iti reklamo ken mangipila da ti sungbat iti uneg ti naituding a panawen ti komite.

Kiddawen met ti kampo da nga ibasura iti reklamo.

Kinuna met ti abogado na a saan a binaybay-an ti Senador iti opisina na a maipagarop nga agtaltalinaed a silulukat ken agtultuloy nga agub-ubra laksid iti kinaawan ti pisikal a presensya.

Inlawlawag na a saan a makadar-ay ni Dela Rosa gapu iti sangsangwen na nga arrest warrant ken posibilidad a maisango iti International Criminal Court (ICC).

Nupay kasta, kinuna na a posible nga agpakita iti Senador nu iyakar kadagiti lokal a korte dagiti kaso a sangsangwen daitoy.

Maipalagip nga impila ti grupo nga Wag Kang KuCorrupt iti ethics complaint kontra kenni Dela Rosa gapu iti nabayag na a panaglangan kadagiti opisyal a rebbengen kas senador.

Laksid daitoy, agtaltalinaed iti kumpiyansa ti kampo ti agpanpanday-linteg nga ibasar ti komite iti agbalin a desisyon daitoy iti agraraira nga allagaden ken ebidensya.