BR LA UNION – Namnamaen a maidatagan ti kaso a frustrated murder ken grave threat iti maysa nga abogado gaputi pammaltog iti maysa a residente idiay Barangay 13, Magat Salamat, Laoag City, Ilocos Norte.
Segun kenni P/Capt. Rudy James Jacalne, Deputy Chief of Police ti Laoag City Police Station, nabigbig ti biktima a ni Edmund Pasion, 55 anyos, addaan asawa idinto a ti suspek ket maysa nga abogado, 29-anyos, agpada a residente ti nasao a barangay.
Maibasar iti inisyal nga imbestigasyon, naaddaan ti saan a panag-kinnaawatan iti biktima ken suspek, a nagbanag iti pammaltog.
Kinuna ni Jacalne, naganawa ti biktima iti baetan ti maysa a grupo ken suspek ngem pinaltugan ti suspek iti naminsan a daras iti likod ti biktima.
Narekober manipud iti suspek ti maysa a kalibre 9mm Glock 43X Pistol ken maysa a basyo ti magazine ti kalibre 9mm.
Mainaig ti daytoy, imbaga ni P/Capt. Rogeline Ibe, tagapagsarita ti Laoag City Police Station, a narekober iti nakapasamakan ti insidente iti uppat a kapsula ti kalibre 9mm, maysa a cartridge case ti kalibre 9mm ken maysa a deformed fired a bala ti kalibre 9mm.
Kabayatanna, naiturong ti biktima idiay Mariano Marcos Memorial Hospital and Medical Center siyudad ti Batac tapno maagasan.
