LA UNION – Maiparbeng laeng segun kenni Senate Committee on Women Chairman Senadora Risa Hontiveros iti nagbalin nga addang ti Office of the Solicitor General nga ipakanselar iti birth certificate ni suspended Bamban Mayor Alice Guo.
Segun kenni Hontiveros, naan-anayen a nakorner ni Guo seknan iti panangabuso na iti late registration ti birth certificate, isunga nasay-sayaat kunana nga umikkat laengen daytoy ken ibutaktak dagiti adda iti likudan ti nalawa nga scam enterprise idiay Tarlac.
Binalakadan na ti mayor nga agsaon kalpasan a nangidatag ti Office of the Solicitor General iti petisyon para iti kanselasyon ti “certificate of live birth.”
Kabayatanna, impaganetget pay ti senadora a sumango iti sumaruno a panagdengngeg ni Guo ken agbalin koma daytoy a napudno.
Napaneknekanen kunana iti imbestigasyon ti Senado a rugi pay laeng ket kuwestiyonablen ti birth certificate ni Guo.
Maipalagip a pinagkedkedan ni Guo iti napalabas a panagdengngeg, iti imbitasyon ti Senado gapu iti maipagarop nakaru nga stress ken anxiety a narikna na gapu kadagiti awan basaran kunana nga alegasyon maikontra kenkuana.
Nupay kasta, kumbinsido ni Senador Sherwin Gatchalian a saan makapad-padas ti anxiety iti mayor nga inaramid na a rason tapno saan a dumar-ay iti panagdengngeg ti senado.
Iti kanito kunana a pagkedkedan latta ni Guo a dumar-ay iti imbestigasyon ita a lawas ket ma-contempt daytoy ken maiyetnagan ti arrest warrant.
