LA UNION – Mairugi ti African swine fever vaccination program ti gobyerno idiay Lobo, Batangas, a maibilang a “ground zero“ ti ASF outbreak.
Segun iti Department of Agriculture, maipasidong nga umuna iti panagamiris dagiti baboy iti nasao a lugar, tapno madetermina dagiti addaan ti sakit ken awan.
Segun kenni Agriculture Assistant Secretary Arnel de Mesa, dagiti laeng baboy nga awan ti sakitna nga ASF iti maipaayan ti bakuna.
Posible nga ita a lawas ket marugyan ti panagbakuna kadagiti fatteners ken growers, nga immuna a naipasidong iti testing.
Maipalagip nga imbaga ti ahensiya a 10,000 doses ti ASF vaccine iti na-purchase babaen ti emergency procurement.
Iti nasao a bilang ket paset iti 600,000 doses a gatangen ti gobyerno tapno maparmek ti sakit dagiti baboy ditoy pagilian.
Kinuna met ni Batangas Gov. Hermilando Mandanas, 10 a lugar iti probinsiya ti nangideklara ti ASF outbreak, a pakaibilangan idiay Calatagan, Balayan, Lobo, Lian, Lipa, Malvar, Rosario, San Juan, Talisay ken Tuy.
Kinumpirma pay ti gobernador a maysa a hog farmer manipud idiay ili ti Lobo iti maipagarop a nagpakamatay kalpasan a na-appog wenno nalugi ti negosyo na gaputi ASF.
