BR LA UNION – Natay ti ag-ama kalpasan a naaksidente dagitoy iti kawatiwatan ti national highway idiay Barangay Calungbuyan, Balaoan, La Union agarop alas 7:35 ti rabii idi kalman, Enero 24.
Dagiti biktima, nabigbig nga isuda William Valdez, 40-anyos, maysa a delivery boy, driver ti kurong-kurong ken ti anak na a ni Wilfred Valdez, 17-anyos, estudyante, agpada a residente ti Barangay Pantar Sur, Balaoan.
Maibasar iti report, nakalugan ti ag-ama iti nasao a kurong-kurong, agmaris ti nalabbaga, awanan ti plate number, ken naamawan nga awanan ti driver’s license ti nagmaneho.
Nakadinnungpar da iti maysa a Pickup Truck, color gray, addaan ti plate number YAB-8164, minaneho ni Neil John Corpuz, 23-anyos, baro, residente ti San Diego, Pidigan, Abra ken addaan ti driver’s license.
Ti pickup truck driver ket saan a naan-anu bayat a dagiti dua nga occupants na nga isuda Marie Joy Anical, agtawen ti 26, balasang ken Marian Pacupac, agtawen ti 24, balasang, maysa a nurse, ken agpada a residente ti Laskig, Pidigan, Abra ket nagpasar ti minor injuries.
Agpapada dagitoy a naiturong idiay Balaoan District Hospital ngem naideklaera a dead-on-arrival dagiti ag-ama babaen iti attending physician a ni Dr. Ceasar Ferrer.
Maibasar iti initial report iti Baoalan Police Station, maipagarop a nag-overtake ti pickup truck iti sar-sarunwenna a behikulo a nakaigapwanan ti pannakadungpar na iti kasinnabat na a kurong-kurong a maipagarop nga awanan ti headlight.
Agtultuloy iti imbestigasyon dagiti otoridad ti nasao nga insidente.
