Inaprobaran ti Kamara iti maikatlo ken maudi a panagbasar ti House Bill No. 6676 wenno ti “Energy Systems Storage Act” tapno masigurado iti natalged ken agtultuloy a suplay ti koriente iti pagilian.
Iti botos a 192-3, naipasa iti singasing a nairanta a mangipasdek ti nailian a balangkas para iti panangparang-ay ken panagusar ti Energy Storage Systems (ESS).
Agserbi dagiti ESS kas dadakkel a pagipempenan ti koriente a mabalin nga usaren tunggal adda ti panagkurang iti suplay wenno emerhensia.
Panggep ti addang a maliklikan dagiti brownout ken pannakapukaw ti koriente a mangapektar kadagiti pagtaengan, industria, ken komersio.
Renewable Energy (RE) Boost: Manamnama a mapapigsa iti sektor ti renewable energy babaen ti panangallukoy kadagiti investors nga agusar dagiti solar ken wind power batteries, a mangpababa iti panagdependir ti pagilian kadagiti fossil fuels.
Incentives: Mabalin a makagun-od dagiti ESS developers dagiti insentibo iti sidong ti Renewable Energy Law.
Regulasion: Ikeddeng ti linteg iti akem dagiti nadumaduma nga ahensia kas iti Department of Energy (DOE) ken Energy Regulatory Commission (ERC) iti panangipatungpal ken panagbantay kadagitoy a pasilidad.
Segun kenni House Majority Leader Sandro Marcos, maysa kadagiti kangrunaan nga author ti bill, daytoy a sistema ket maiyarig kadagiti “battery” a maus-usar kadagiti flashlights tunggal adda ti outage.
Impaganetgetna pay a ti pannakaipakat ti Energy Storage Systems ket agserbi a napateg a kadua iti pannakapalawa ti nadalus nga enerhia iti pagilian.
Nakalanad met iti singasing a ti pannakaibelleng dagiti napeggad a basura manipud kadagiti ESS ket agtungpal kadagiti linteg pang-ekolohia, bayat a dagiti manglabsing iti regulasion ket mapatawan ti maiyannatup a dusa iti sidong ti EPIRA Law.###
