Maisagsaganan ti kaso kontra iti respondent driver iti napasamak nga aksidente iti kawatiwatan ti national highway a paset ti Barangay Baroro, Bacnotan, La Union a nakadunoran ti dua a pulis.
Daytoy iti kinumpirma ni PMAJ Cresencio Abila Jr, Officer in Charge ti Bacnotan Police Station.
Segun iti nasao nga opisyal, ti agdama ket isagsaganadan dagiti dokumento tapno maipasidong iti inquest proceeding iti opisina iti Provincial Prosecutor para iti panakaidatag ti kaso no sadino posible a sumango ti bus driver iti kaso a reckless imprudence resulting in damage to property ken reckless imprudence resulting to physical injury .
Kabayatanna, ibilbilang ti nasao nga opisyal a maysa a milagro ti nasao a pasamak agsipudta minor injuries iti linak-am ti dua a pulis uray no nagpasar iti nakaro a pannakadadael ti patrol car a naglugan dagitoy.
Maipaisidong dagitoy iti X-ray ken CT Scan tapno maamuan ti kinatalged dagiti biktima.
Maipalagip, agpatrolya kuma dagiti pulis iti Upper Baroro ken idi a nagsikko da iti kannigid ket ditoy a nadungpar isuda ti bus.
Numan pay ginandat ti bus driver ti nagpreno ngem nadungpar na latta ti patrol car agingga a bimmaliktad.
Iti agdama, saan pay a madetermina dagiti otoridad iti gatad ti danyos agsipudta ipakitada pay kadagiti maseknan tapno maamuan ti pakabuklan nga magastos.
Kabayatanna, kagiddan iti nasao ng insidente, nagpalagip ti nasao nga opisyal kadagiti motorista nga agannad iti panagmaneho, saan a napaspas tapno saan a madisgrasya ken saan a makadisgrasya.
