Inkari ni Senate Finance Committee Chairman Senador Sherwin Gatchalian kagiddan ti panangtalantan iti pondo ti Department of Social Welfare and Development (DSWD) a saan da nga ipalubos a maisubli iti Ayuda para sa Kapos ang Kita wenno AKAP Program iti proposed 2026 national budget.
Segun kenni Gatchalian, iti AKAP ket dandani kapada laeng ti Assistance to Individuals in Crisis Situation (AICS), malaksid iti material ken psychosocial assistance nga adda laeng iti AICS.
Natakuatan pay manipud iti Commission on Audit (COA) nga iti AKAP ket mangipapaay dagiti saan nga otorisado a klase ti tulong ken adda dagiti indibidual a saan nga kwalipikado ngem nakaawat.
Impaganetget ti manmanday-linteg nga iti nasao a programa ket inisyatiba ti House of Representatives ken saan a DSWD, isuta inrekomenda na a nayunan iti pondo ti AICS tapno masupusupan iti pagkurkurangan daytoy.
Pinaboran met ni DSWD Secretary Rex Gatchalian a duplication iti AKAP ken sumurot da iti agbalin a kiddeng ti Kongreso.
Innayon ti sekretaryo, adda pay ti nabatbati a pondo iti AKAP a saan a nausar ita a tawen isunga inikkat ti Department of Budget and Management (DBM) iti programa ken dagiti sumagmamano a proyekto manipud iti DSWD 2026 budget – rason ti panagbaba iti budget ti Office of the Secretary iti P221 billion manipud ti P362.3 billion.###
