Imbilin ni Department of Social Welfare and Development (DSWD) Secretary Rex Gatchalian iti Disaster Response Management Group a papartaken ti pannakainayon ti food pack stockpiles, partikular kadagiti probinsia ti Negros Oriental ken Negros Occidental iti Rehion ti Visayas.
Pinasingkedan ni Gatchalian a manamnama a sumangpet ti kanayonan a food packs ita a lawas, ken plano pay ti mangipatulod iti 40,000 boxes of food packs iti tunggal probinsia ti Negros Oriental ken Negros Occidental at a Lunes, Enero 13.
Panggep ti DSWD nga i-preposition ti dagup a 100,000 a kahon ti family food packs (FFPs) tapno masigurado nga addaan dagiti komunidad iti umdas a suplay bayat ti panawen ti panagbettak ti bulkan.
Daytoy nga addang ket kasaruno dagiti pakdaar manipud iti Philippine Institute of Volcanology and Seismology (Phivolcs), nga idi Enero 11 ket naipadamag iti panangipugso ti Sulphur dioxide babaen ti Bulkan Kanlaon, a posible a mangipasimudaag iti panagbettak a kapada dagiti napasamak idi napan a tawen kadagiti bulan ti Hunio ken Disiembre.
Kabayatanna, impangato ti Phivolcs ti alert Level 3 ti Mount Kanlaon gapu iti mapaspasaran a ‘magmatic unrest’ ken ti peggad ti kellaat a panagbettakna, panagayus ti lava, ken dadduma pay a peggad kas iti ashfall ken panagayus ti lahar, nangruna kadagiti napigsa nga agtudo.
