BR LA UNION – Naobserbaran ti panagbettak ti Bulkan Kanlaon pasado alas-4:39 itay malem, Pebrero 19, 2026, a nagpaut ti dua a minuto maibasar iti seismic record ti Philippine Institute of Volcanology and Seismology (PHIVOLCS).
Nangipugso daytoy ti napuskol asok nga immabot iti 2,000 metro a kangato.
Nakitaan pay ti panagayos ti pyroclastic density currents wenno “uson” iti bakrang ti bulkan nga immabot ti maysa a kilometro manipud iti summit crater.
Agtaltalinaed iti Alert Level 2 iti bulkan a senyal ti agtultuloy a panagalburuto ken nainget a maipawil ti sumrek iti uneg ti uppat a kilometro a radius ti Permanent Danger Zone, gaputi pangta a kellaat a bumtak, ashfall, ken panagayos ti delikado a volcanic materials.
Nabalakadan dagiti residente iti aglawlaw ti bulkan nga agtalinaed nga alerto ken suruten iti abiso dagiti otoridad.
