Umabot iti nasurok 92,000 residente manipud iti 52 a barangay idiay probinsiya ti Albay ti apektado ti ashfall manipud Mayon Volcano, bayat nga agtultuloy iti clearing operations kagiddan dagiti report a pannakatay dagiti taraken nga ayup iti sumagmamano a lugar.
Segun kenni Guinobatan Mayor Ann Gemma Ongjoco, umabot iti 26,654 pamilya wenno 91,225 indibidwal iti nasao a probinsiya ti naapektaran ti panagtinnag ti dapo bayat a nasurok 50 a barangay ti arigna nagaburan ti napuskol a dapo, a nangparnuay ti nakaru a perwisyu iti inaldaw-aldaw a trabaho dagiti residente.
Kadagiti kangrunaan a kalsada, dandani zero visibility iti napasaran gaputi kapuskol ti dapo, ket nai-deploy dagiti fire truck manipud naduma-duma nga ili tapno maipatungpal a dagus ti panagdalus.
Nangigubway pay daytoy ti peligro kadagiti motorista ken temporaryo a pannakasinga iti taray ti trapiko.
Dakkel ti perdisyon iti sektor ti agrikultura, agsipudta nagaburan ti dapo iti kapagayan nga asidegen a maapit.
Idiay ili ti Camalig, inpadamag ni Mayor Carlos Irwin Baldo ti pannakatay ti sumagmamano a dingwen gapwanan ti ashfall.
Kinuna met ni Doreen Abelinde, officer-in-charge ti Mayon Observatory, ti ashfall ket gubway iti serye ti aktibidad ti bulkan kabilang iti strombolian eruptions, pyroclastic density currents, panagregga-ay ti lava dome, ken apagbiit a lava fountaining. Maipagarop nga umabot iti 3,000 metro ti kangato ti ash plume.
Agtaltalinaed iti Alert Level 3 iti Mayon Volcano, kaipapanan nga adda posibilidad ti kanayunan a panagbettak, isunga agtultuloy ti palagip dagiti otoridad iti publiko nga agtalinaed nga alerto ken agtulnog kadagiti safety protocol.
