Kiniddaw ni Quezon City Fifth District Representative Patrick Michael Vargas kadagiti pribado a sektor nga aktibo a makipaset iti panangtaming iti job mismatch ken kinaawan panggedan.
Kinuna ni Vargas a dakkel ti maitulongna no makipaset ti pribado a sektor iti pannakaipatungpal ti Enterprise-based Education and Training (EBET) Framework Act.
Impaganetget ni Vargas a babaen ti EBET Framework Act ket makaaramid iti upskilling wenno mapasayaat iti abilidad dagiti mangmangged babaen ti panakaipasidong kadagiti specialized trainings.
Daytoy ket tapno makagun-od iti ad-adu a gundaway para kadakuada a makastrek kadagiti mabalin a trabaho manipud nadumaduma nga industria ditoy pagilian.
Dinakamat ni Vargas a dagiti negosyo a mangipatungpal iti EBET wenno apprenticeship programs ket maipaayan iti insentibo a maibasar iti linteg kas iti pannakaibaba manipud iti mabuis a biruk da nga kaibatugan ti 50% iti aktual a gastosda iti trainings.
Innayon ni Vargas a saanen a kasapulan nga agbayadda iti taxes and duties no mangtedda iti donasion, subsidy wenno tulong pinansial kadagiti certified TESDA technical-vocational institutions.
