Ti nangatngato a kaltas ti binulan a kontribusion iti Social Security System (SSS) ti pribado a sektor ti mangsarungkar iti baro a tawen.
Maibasar ti anunsio manipud iti state-run pension fund, mangrugi inton Enero 1, 2025, ngumaton ti SSS contribution rate agingga iti 15% manipud iti 2023 contribution rate a 14%.
Segun iti SSS, naingato ti contribution rate tapno mapaadu ti revenues ken masigurado ti long-term stability.
Sakopen ti adjusted contribution rate ti amin nga business employers ken empleado, household employers ken workers wenno katulong, self-employed individuals, voluntary ken non-working spouse members kasta met dagiti land-based OFW members.
Para kadagiti business employers ken empleado, self-employed members, voluntary members, ken non-working spouse members, ngumato ti minimum Monthly Salary Credit (MSC) da agingga iti P5,000, idinto a ti maximum MSC ket P20,000.
No maipapan met kadagiti household employers ken workers, ngumato ti minimum MSC agingga iti P1,000, a ti maximum ket P20,000.
Para kadagiti land-based OFW members, ngumato ti minimum MSC agingga iti P8,000 ken ti maximum MSC ket P20,000 metlaeng.
