Nangpalagip ti Social Security System (SSS) kadagiti pensioners ken survivor pensioners ditoy probinsia ti La Union, seknan iti nainget a panangtungpal iti naituding a personal reporting schedule tapno maliklikan ti pannakasuspende ti binulan a pension.
Segun ti SSS, masapul a mapan dagiti survivor pensioners iti kaasitgan nga opisina ti SSS maysa (1) a bulan sakbay wenno iti birth month ti pimmusay nga asawa da tapno ag-report.
Mabalin nga agresulta ti dagos a pannakasuspende ti pension no saan a nakareport dagiti maseknan iti las-ud ti naikeddeng a panawen.
Para kadagiti retiree pensioners, impalagip ti SSS a dagiti agtawen ti 80 ken agpangato ket masapul nga ag-report iti tinawen ti bukodda a birth month.
Ti tinawen a personal reporting ket paset dagiti addang ti ahensia tapno masigurado ti agtultuloy a pannakaipaay dagiti benepisio ken malapdan ti aniaman a pannakasuspende ti pension.
Pinaregta ti SSS dagiti amin a naapektaran a pensionado a makiuman iti kaasitgan a sangay ti SSS para iti kanayonan a panangiwanwan kadagiti kasapulan a dokumento ken eksakto a proseso ti personal a panagireport.
Para iti dadduma pay nga anunsio ken update, mabalakadan ti publiko a surotenda iti opisial nga anunsio ti SSS wenno direkta a sumarungkar iti opisinada.###
