Nangiruar ti bukodda a Transparency Portal iti PhilHealth ken Social Security System (SSS) kalpasan nga indauluan ni Presidente Ferdinand R. Marcos Jr. iti pangilunsad dagiti serye ti transparency platforms para kadagiti nadumaduma nga ahensia ti pagilian.
Segun ti Department of Information and Communications Technology (DICT) Secretary Henry Aguda, dagiti portal ti DPWH, PhilHealth, ken SSS ket paset ti direktiba ti Presidente nga aramaten iti teknolohiya tapno labanan iti korapsion, aramiden nga episiente iti serbisio ti gobierno, ken papigsaen iti panagtalek ti publiko.
Nailunsad iti DPWH Transparency Portal idi Nobiembre 24 kas paset ti kampanya para iti open government, bayat nga idi Martes ket nairuar met dagiti transparency portal ti PhilHealth ken SSS.
Inladawan ni Aguda dagiti portal kas napateg nga addang iti panangpapigsa ti digital governance ti pagilian ken aramiden a silulukat ken nalaka a maawatan iti impormasion maipanggep iti budget ken panaggastos ti gobierno.
Mangar-aramat dagiti portal ti Artificial Intelligence (AI) tapno dagos a malawlawagan ken ikkan sungbat dagiti damag ti publiko maipanggep iti panagusar iti pondo ti gobierno.
Addan daytoy ti visual dashboard a mangipakpakita ti breakdown ti budget ken AI-powered chatbot a mabalin a mangilawlawag babaen ti lengguahe nga English, Filipino, wenno Taglish.
Innayon pay ti sekretario nga agbalin nga accessible dagiti portal iti websites ti DPWH, PhilHealth, SSS, ken ti open.gov.ph.
Manamnama a makatulong dagiti portal iti panangpapigsa ti panagtalek ti publiko, panangliklik iti anomalya, panangpapartak ti reporting, ken panangpapigsa ti kampania kontra korapsion.
Kenuna pay ti ahensia a nangrugin iti pananglivestream iti procurement bidding ti DICT kas paset iti panangpalawa ti transparency, a sursuruten metten dagiti sumagmamano a lokal a gobierno.
Manamnama a mangilunsad met ti transparency portals dagiti dadduma pay nga ahensia kadagiti sumarsaruno a lawas.#
