Nangidatag ti Albay Police ti arrest warrant kontra kenni sigud a Department of Public Works and Highways (DPWH) Bureau of Maintenance Director Gene Ryan Alaurin Altea kalpasan a nairaman ti naganna iti listaan dagiti ipabpabirok dagiti otoridad a sumangsango kadagiti kaso nga adda pakainaigan na iti nalawa a korapsion kadagiti flood control projects ti pagilian.
Segun ti Daraga Municipal Police Station, naiserbi iti warrant iti maysa kadagiti pagtaengan ni Altea idiay Barangay Tagas, Daraga, ngem awan ti nakitada a personalidad ken mapapati nga adda idiay Manila ti asawa ken ina ti nadakamat nga opisial.
Ti warrant of arrest kontra kenni Altea ket impaulog ti Sixth Division ti Sandiganbayan idi Nobiembre 21 a nakailanadan dagiti panaglabsing iti Article 217 ken Article 172 Section 4 ti Revised Penal Code wenno dagiti reklamo a malversation of public funds through falsification of public documents.
Malaksid ditoy ket sangsanguen pay ni Altea ti naisina a kaso a panaglabsing iti Anti-Graft and Corrupt Practices Act ken karaman iti listaan kadagiti napaulogan ti Hold Departure Order (HDO) ti Bureau of Immigration (BI).#
