Pinasingkedan ti Presidential Anti-Organized Crime Commission a nakaruaren ti suspended Bamban, Tarlac Mayor Alice Guo ditoy pagilian ken napan iti di kumurang a tallo a pagilian iti Southeast Asia, ti kaudian ket ti Indonesia.
Segun kenni PAOCC spokesperson Winston Casio, simmangpet idiay Indonesia idi Agosto 18 ni Guo, a maipagarup met a Chinese citizen a ni Guo Hua Ping.
Kinuna ni Casio a simmangpet ni Guo idiay Kuala Lumpur, Malaysia idi Hulio 18 manipud Denpasar, Indonesia babaen ti Batik Air 177.
Isu ket simmangpet idiay Singapore manipud idiay Kuala Lumpur babaen ti Jetstar Asia 686 idi Hulio 21.
Idi Agosto 18, simmangpet ni Guo idiay Batham, Indonesia manipud idiay Singapore babaen ti ferry boat.
Kinuna ni Immigration Commissioner Norman Tansingco a nakaawat ti bureau iti impormasion a nakaruaren ni Guo manipud ditoy pagilian a saan a limmasat kadagiti otoridad ti immigration ken illegal a nagbiahe ni Guo idiay Malaysia idi Hulio.
Kalpasanna ket naglugan daitoy iti eroplano a napan idiay Singapore kakaduana da Sheila Guo ken Wesley Guo.
Inaramid ni Tansingco ti statement sumagmamano nga aldaw kalpasan a simmangpet manipud iti ASEAN meeting dagiti immigration heads idiay Vietnam.
Kinuna ni Tansingco a bayat a nailista ti nagan ni Guo iti immigration lookout bulletin (ILBO) ti Department of Justice, saan a nairekord iti sistema ken centralized database ti BI ti panagruar na.
Ti Bureau of Immigration ket addaan ti presensya kadagiti amin a regular nga international ports of entry and exit kas dagiti internasional nga eropuerto ken dagiti puerto ti baybay, idinto a dagitiinformal exits ket imanmanehar ken banbantayan babaen kadagiti sabali nga aviation wenno maritime agencies.
Kinuna ni Senador Risa Hontiveros a ti impormasionna ket mangipakita a ni Guo, a nabigbig met a kas Chinese national a ni Guo Hua Ping, ket pimmanaw iti pagilian idi Hulio 18.
Segun iti senador, inusar ni Guo ti pasaporte ti Pilipinas tapno pumanaw iti pagilian.
Kalpasan a napan idiay Malaysia, innayon ni Hontiveros a napan ni Guo idiay Singapore tapno sarungkaran ni tatangna a Guo Jian Zhong, inana a ni Lin Wen Yi, ti kabsatna a ni Wesley Ong, ken ti nainaganan a representante ti naraut a POGO hub idiay Porac, Pampanga Lucky South 99 a ni Cassandra Ong.
