LA UNION – Saan a mailemmeng ti kakaisuna a naulila a miyembro ti maysa a pamilya ti napait a mapadpadasanna a pannubok iti biag kalpasan a matay dagiti nagannak, dua a kabsat ken ti maladaga a kaanakanna a karaman iti 20 a natay ti nakaam-ames nga aksidente ti lugan idiay ili ti Agoo, La Union idi aldaw ti Paskua.
Iti istorya ni Aljean Cabradilla ti Bombo Radyo, kinunana nga isuna laengen ti nabatbati a miyembro ti pamilyana kalpasan a matay iti ipatpategna nga ama ken ina, uray dagiti dua nga inaudi a kabsat, ken ti maymaysa a kaanakanna.
Uray no nakaro a kinaliday ti marikriknana gapu iti pannakaulila kadagiti ipatpategna iti biag, ket pilitenna ti makabangon ken sanguen dagiti pannubok.
Daytoyen kinunana iti kalidayan a Paskua ken Baro a Tawen iti biagna gapu ta naggigiddan a natay dagiti nagannak ken kakabsatna.
Kabayatanna, nakaimassayag metten iti bangkay dagiti 18 a biktima ti aksidente idiay auditorium ti Barangay Pilar, ili ti Bauang, La Union.
Ti dua pay a bangkay ket inyawid metten iti pamilyada kadagiti bukodda a pagtaengan.
Personal a nagturong ken kinasarita itattay aldaw ni Bauang Municipal Mayor Martin de Guzman III dagiti naulila tapno ammuen dagiti dadduma pay a kasapulan daytoy.
Dupudop metten idiay Barangay Pilar dagiti dadduma pay kakabagyan ken dagiti makipagladladingit kadagiti naulila a naggapu manipud ti naduma-duma a lugar.
